بقلم نيمو محمد الجزء الرابع والأخير آدم كان قاعد في العربية وعينه مثبتة على مراد اللي سايق بهدوء غريب ونرمين قاعدة في الكرسي الخلفي حاسة إن فيه مص.........يبة جاية آدم قال بصوت هادي مراد وقف العربية مراد بص له من المراية وقال في إيه يا آدم قولتلك وقف العربية مراد ركن على جنب الطريق والتفت له بابتسامة باردة إنت ذكي يا صاحبي بس للأسف فهمت متأخر نرمين شهقت وحطت إيدها على بوقها يا نهار أبويا أسود هو إنت كمان طلعت حرامي يا مراد ده أنا كنت لسه هطلب منك فلوس سلف مراد تجاهلها وبص لآدم هات الملف والصورة اللي معاك ونرمين هتمشي من هنا سليمة آدم ضيق عينيه إنت شغال مع اللواء سامح مراد هز راسه من البداية يا آدم أنا اللي كنت بوصل له أخبار تحركاتك آدم بص له بصدمة ووجع واضح في عينيه أنا كنت معتبرك أخويا مراد نزل عينه للحظة لكنه رجع لجموده وأنا آسف بس دي كانت الطريقة الوحيدة عشان أحمي أخويا نرمين اتدخلت باستغراب أخوك مين يا حبيبي هو إحنا دخلنا مسلسل تركي وأنا آخر من يعلم مراد بص لها وقال أخويا هو صاحب شركة النورس اللي اتهموكي بسرقتها آدم اتجمد مكانه يعني إنت عارف إنه عايش مراد رد بسرعة أيوه وعارف كمان إن اللواء سامح هو اللي سرق الشركة ولفق القضية لنرمين عشان يخفي تحويلات مالية بملايين الجنيهات نرمين قربت منه وقالت طب ما كنت تقول من الأول يا أخي بدل الفيلم الهندي ده مراد اتنهد لأن اللواء سامح كان بيراقب كل خطوة بعملها ولو عرف إني بساعد أخويا كان قتله آدم نزل من العربية وفتح الباب الخلفي انزلي يا نرمين نرمين نزلت وهي بتبص له بخوف إنت هتعمل إيه آدم وقف قدام مراد وقال هخلص الموضوع ده بطريقتي مراد رفع إيده وقال استنى يا آدم أنا معايا دليل يوقع اللواء سامح بس لازم نوصل للمستشفى قبل ما رجاله ينقلوا أخويا آدم فضل باصص له للحظات وبعدين قال لو اكتشفت إنك بتكدب عليا مش هسامحك أبدًا مراد هز راسه وقال معاك حق نرمين رفعت إيدها فجأة معلش يا جماعة هو ينفع نخلص الدراما دي بسرعة عشان أنا جعانة آدم ومراد بصوا لها في نفس اللحظة نرمين رفعت كتفها وقالت إيه يعني هو الخيانة بتشبع مثلًا ركبوا العربية من جديد واتجهوا للمستشفى المهجورة وفي الطريق مراد شرح لهم الخطة كان لازم يدخلوا المكان من المدخل الخلفي ويوصلوا لصاحب الشركة قبل ما رجال اللواء سامح يعرفوا إنهم وصلوا بعد نص ساعة وقفوا قدام المبنى القديم نرمين بصت للمكان وقالت هو إنتوا ليه كل مصايبكم بتحصل في أماكن ضلمة مفيش مستشفى عدلة في البلد آدم بص لها وقال خليكي ورايا ومهما حصل ما تتحركيش من مكاني نرمين هزت راسها بجدية حاضر يا سيادة الظابط آدم ابتسم وقال أول مرة تسمعي الكلام من غير مناقشة نرمين ردت بسرعة ما تفرحش أنا بس مستنية أشوفك هتعمل إيه دخلوا من باب جانبي ووصلوا لممر طويل وفي آخره سمعوا صوت صراخ مراد همس ده صوت أخويا آدم أشار لهم يسكتوا وقرب من الباب بحذر جوه الأوضة كان صاحب شركة النورس مربوط على كرسي وقدامه اللواء سامح ورجل الساعة الفضية اللواء كان بيقول بغضب الملفات فين يا فؤاد صاحب الشركة رد بتعب مش هتوصلك حاجة مني اللواء رفع سلاحه وقال آخر فرصة قبل ما يضغط على الزناد الباب اتفتح بعنف آدم دخل وهو رافع سلاحه حط السلاح على الأرض يا سامح اللواء اتفاجئ لكنه ضحك إنت لسه فاكر نفسك ظابط يا آدم بعد ما بقيت مطلوب للعدالة آدم رد بثبات أنا ظابط وهفضل ظابط طول ما فيه ناس زيك فاكرة إن السلطة معناها إنك تظلم الناس اللواء بص لرجاله خلصوا عليهم بدأت المواجهة ورجال اللواء حاولوا يمسكوا آدم ومراد لكن نرمين كانت واقفة عند الباب وشافت صندوق أدوات قديم جنبها بصت للصندوق وبعدين للرجالة وقالت يا جماعة أنا آسفة بس إنتوا اللي بدأتوا مسكت مطفأة الحريق ورشتها في نص الأوضة فالدنيا اتملت بودرة بيضا والكل بدأ يكح آدم صرخ نرمين إنتي بتعملي إيه ردت وهي بتجري بساعدك يا حبيبي هو إنت عايزني أتفرج آدم سمع كلمة حبيبي وسط الخناقة لكنه ما لحقش يرد لأنه كان بيحاول يمنع اللواء من الهرب مراد قدر يحرر أخوه ويمسك رجل الساعة الفضية بمساعدة آدم وفي وسط الفوضى نرمين لاحظت إن اللواء بيحاول يهرب من باب خلفي جريت وراه وهي بتصرخ استنى يا حرامي الفلوس اللي سرقتها دي بتاعتي أنا كمان عايزة تعويض اللواء لف عليها بغضب ومد إيده يمسكها لكنها تفادت حركته وخبطت جرس إنذار الحريق الموجود على الحيطة بدأ صوت الإنذار يدوّي في المستشفى واشتغلت أضواء الطوارئ آدم وصل في اللحظة المناسبة ومسك اللواء قبل ما يهرب حاول اللواء يقاوم لكنه ما قدرش آدم قيد إيده وقال انتهت يا سامح اللواء بص له بكره فاكر إنك كسبت يا آدم آدم رد بثبات لأ العدالة هي اللي كسبت بعد دقائق وصلت قوة الشرطة اللي كان مراد اتصل بيها قبل ما يدخلوا المستشفى وسلموهم اللواء سامح ورجاله وكل الأدلة اللي تثبت تورطهم في سرقة الشركة وتلفيق التهمة لنرمين صاحب الشركة فؤاد اتنقل للمستشفى عشان يتعالج وبعد التحقيقات اعترف بكل اللي حصل وقدّم تسجيلات ومستندات تثبت براءة نرمين وآدم وبعد أسبوع ظهرت الحقيقة كاملة واترفعت التهم عن نرمين ورجع آدم لشغله بعد ما ثبت إن الاتهامات اللي اتوجهت له كانت ملفقة أما نرمين فكانت قاعدة في بيتها بتتفرج على التلفزيون لما سمعت المذيع بيقول أعلنت النيابة العامة براءة نرمين عبدالسلام من جميع التهم المنسوبة إليها بعد ثبوت تورط شبكة إجرامية في تلفيق القضية نرمين قامت من مكانها وصرخت يا مامااااا أنا بقيت بريئة رسمي أمها خرجت من المطبخ وهي ماسكة المعلقة هو إنتي كنتي متهمة أصلًا يا بت نرمين بصت لها بصدمة نعم يا ماما إنتي مش بتتفرجي على الأخبار ولا إيه أمها ردت ببرود أنا بتفرج على أسعار الخضار يا حبيبتي أهم من الأخبار كلها نرمين حطت إيدها على قلبها وقالت والله ما أنا عارفة أنا طالعة لمين في العيلة دي وفجأة جرس الباب رن فتحت نرمين لقت آدم واقف قدامها ببدلة مدنية وفي إيده بوكيه ورد كبير نرمين بصت للورد وبعدين له وقالت إيه ده يا حضرة الظابط هو فيه متهم جديد آدم ابتسم لأ المرة دي جاي أطلب إيد المتهمة القديمة نرمين فتحت بوقها من الصدمة إنت بتقول إيه آدم دخل خطوة وقال بقول إني حبيتك يا نرمين حبيتك من أول يوم دخلتي فيه القسم وإنتي ماسكة مسدس وكيس كشري وبتتهددي تقبضي عليا نرمين بدأت تضحك ودموعها نزلت من الفرحة إنت بتحبني بجد آدم قرب منها وقال أكتر مما تتخيلي وأنا عارف إنك هتتعبي أعصابي طول العمر بس مش عايز أعيش يوم واحد من غيرك نرمين بصت له بحنان وقالت طب بصراحة يا آدم أنا كمان حبيتك من أول يوم آدم ابتسم بجد نرمين هزت راسها وقالت أيوه من أول يوم ما صادرت مني كيس الكشري وأنا عرفت إنك راجل بخيل ولازم أفضل جنبك عشان أحافظ على فلوسك آدم رجع خطوة وبص لها بصدمة يا بنت المجنونة حتى في اللحظة دي نرمين انفجرت من الضحك وهو ضحك معاها وبعدها مد إيده ليها تتجوزيني يا نرمين نرمين بصت لإيده وقالت موافقة بس عندي شروط آدم اتنهد قولي يا ست الشروط أول شرط ما تحبسنيش تاني موافق تاني شرط كل يوم جمعة كشري من عند أحسن محل موافق تالت شرط لما نتخانق ما تستخدمش صفارة الشرطة آدم ضحك وقال والله ده إنتي اللي محتاجة تتقبضي عليكي نرمين مدت إيدها وحطتها في إيده وقالت خلاص اتفقنا يا حضرة الظابط وبعد شهر اتعمل الفرح وسط العيلة والأصحاب ومراد كان واقف جنب آدم وبيقوله مبروك يا صاحبي ربنا يعينك آدم بص له باستغراب يعينني على إيه مراد أشار لنرمين اللي كانت بتخانق مع المصور عشان يصورها من الناحية الحلوة على اللي انت اتجوزتها دي يا حبيبي آدم ضحك وقال والله أنا اللي جبت ده لنفسي في اللحظة دي نرمين نادت عليه يا آاااادم آدم رد بسرعة أيوه يا حبيبتي تعالى بسرعة فيه واحد سرق مني الموبايل آدم جري ناحيتها وهو بيدور على الموبايل ومراد انفجر من الضحك بعد دقيقتين نرمين طلعت الموبايل من شنطتها وبصت لهم ببراءة أهو لقيته آدم حط إيده على راسه يا بنتي إنتي هتجلطيني نرمين قربت منه ولفت إيديها حوالين دراعه وقالت بس بتحبني آدم بص في عينيها وابتسم بعشقك يا مصيبتي نرمين ابتسمت وقالت وأنا بعشقك يا حضرة الظابط وبعدها قربت منه وهمست بس على فكرة أنا لسه محتفظة بصورة القضية آدم بص لها بصدمة ليه يا بنتي نرمين ضحكت وقالت عشان كل ما نتخانق أقولك إنك أول واحد اتهمني ظلم في حياتي وأخليك تصالحني بكيس كشري كبير آدم رفع إيده للسما وقال يا رب صبرني على المجرمة اللي بحبها والكل انفجر في الضحك وانتهت حكاية الظابط آدم الدمنهوري والمجرمة المظلومة نرمين عبدالسلام اللي دخلت حياته مته.

.........مة وخرجت منها حبيبته ومراته وأكبر قضية في حياته كانت إنها سرقت قلبه من غير إذن نيابة ولا محضر رسمي النهاية ❤️😂❤️ تمت بحمد الله بقلم نيمو محمد

الأكثر قراءة الان

مهران نوره عبد الرحمنمنذ شهرسليم وليلي ملك إبراهيممنذ شهردعاء احمدمنذ شهر